పాపన్నపేట, వెలుగు: యువత బెట్టింగ్, ఆన్లైన్ యాప్ ల బారిన పడి భవిష్యత్ ను నాశనం చేసుకోవద్దని డీఎస్పీ ప్రసన్నకుమార్ సూచించారు. సైబర్ నేరాలు, బెట్టింగ్ ల వల్ల కలిగే అనర్థాలపై బుధవారం పాపన్నపేటలో అవగాహన కల్పించారు. అనంతరం పోగొట్టుకున్న సెల్ ఫోన్లను బాధితులకు అందజేశారు. ఆయన మాట్లాడుతూ.. మొబైల్ ఫోన్కు వచ్చే మోసపూరిత లింకులను ఓపెన్ చేయవద్దని సూచించారు. అపరిచిత వ్యక్తులకు నగదు బదిలీ చేయవద్దన్నారు.
యువకులు బెట్టింగ్ యాప్ ల బారిన పడి మోసపోవద్దని, వీటివల్ల ఎన్నో కుటుంబాలు ఆర్థికంగా ఇబ్బందులు పడ్డాయని గుర్తు చేశారు. తల్లిదండ్రులు తమ పిల్లల కదలికలను ఎప్పుడూ గమనిస్తూ ఉండాలని సూచించారు. పోలీస్ స్టేషన్ పరిధిలో సెంట్రల్ ఎక్విప్మెంట్ ఐడెంటిటీ రిజిస్టర్ (సీఈఐఆర్) వెబ్ పోర్టల్ ద్వారా 22 సెల్ ఫోన్లను గుర్తించి బాధితులకు అందించారు. ప్రజలు తమ ఫోన్ ఐఎంఈఐ నంబర్లను సురక్షితంగా భద్రపరుచుకోవాలని, ఏదైనా సమస్య ఎదురైతే వెంటనే పీఎస్లో ఫిర్యాదు చేయాలన్నారు. ఈ సందర్భంగా సీఐ రాజశేఖర్ రెడ్డి, ఎస్ఐ శ్రీనివాస్ గౌడ్, పోలీసు సిబ్బందిని డీఎస్పీని అభినందించారు.
